English (UK) შალვა ხერხეულიძე
1958 წლის 18 მაისი. საქართველოს თეატრალური საზოგადოება და ერისთავის თეატრი აღნიშნავდა საქართველოს სახალხო არტისტის დაბადების 50 წელს. გორის თეატრის ხუთასკაციანი დარბაზი სავსე იყო მოწვეული სტუმრებით და მაყურებლებით. საღამო შესავალი სიტყვით გახსნა სსრკ სახალხო არტისტმა, სტალინური პრემიის ლაურეატმა ვერიკო ანჯაფარიძემ, ჟურნალ ,, საბჭოთა ხელოვნების ,, მთავარმა რედაქტორმა ოთარ ეგაძემ, ისაუბრა მსახიობის შემოქმედებით მოღვაწეობაზე.
ბატონ შალვა ხერხეულიძეს მიესალმნენ სსრკ კავშირის სახალხო არტისტები, სტალინური პრემიის ლაურეატები: აკაკი ხორავა, ვასო გოძიაშვილი, ემანუელ აფხაიძე, პიერ კობახიძე და სხვები.... შემოქმედებითი წლები საოცარი სისწრაფით მიჰქროდნენ. იყო სამოცდაათი, ოთხმოცი წლის აღსანიშნავი საღამოები....
დღეს, 2024 წლის 21 მაისს ბატონ შალვა ხერხეულიძეს, თეატრისა და კინოს უნიჭიერეს აქტიორს დაბადებიდან ას თექვსმეტი წელი შეუსრულდებოდა .მთელ საქართველოს უყვარდა საყოველთაოდ აღიარებული შემოქმედი, ხერხეულიძეთა გვარის ღირსეული წარმომადგენელი, რომლის კაცური ცხოვრება და სცენიური სიცოცხლე თეატრისადმი ერთგულების საუკეთესო მაგალითი იყო თაობებისთვის.
შალვა ხერხეულიძე პავლე ფრანგიშვილთან ერთად იბრძოდა გორის თეატრის აღორძინება - განვითარებისთვის, მასთან ერთად ქმნიდა ერისთავის თეატრის მდიდარ ისტორიას, საკუთარი შემოქმედებითი მოღვაწეობით ამდიდრებდა მის შემოქმედებით რეპერტუარს. თანაბარი ოსტატობით ქმნიდა მსახიობი ურთულეს სახეებს: ვახტანგ მეექვსე ( დ. ქორქია ,, დ. გურამიშვილი ‘’), თეიმურაზ პირველი ( ი. ვაკელი ,, გიორგი სააკაძე ’’), ბაშიაჩუკი ( ა, წერეთელი ,, ბაშიაჩუკი“ ), თედორე ( ო. ჩხეიძე ,, თედორე “ ), და სხვა. კინოში მსახიობს ოცდაათამდე როლი აქვს შესრულებული. ,, მისი შემოქმედების მზე დიდხანს იდგა ზენიტში, გვარით, წარმომავლობით, ნიჭიერებით, ბრწყინავდა მისი აქტიორული ხელოვნება, ჩვენებული, ძარღვიანი ქართული მადლით“ - წერდა ხელოვნებათმცოდნე ქეთევან გოგიაშვილი.
ერისთავის თეატრის სცენაზე ბრწყინავს საქართველოს სახალხო არტისტის შალვა ხერხეულიძის ვარსკვლავი და მთელ საქართველოს ნათელსა ფენს. ,, ღიმილის ბიჭების პაპა“ განაგრძობს არსებობას ჩვენს მეხსიერებაში, თეატრალურ აფიშებსა და კოსტიუმებში, ფოტო-მასალებსა და კინო ფილმებში. დღეს ბატონი შალვა გვასწავლის თანამედროვეებს , როგორ უნდა ატარო ღირსეულად ადამიანობის ტვირთი და შემოქმედის საპატიო სახელი.
მივუყვებით კულტურის უძველეს თეატრალურ ქალაქში შალვა ხერხეულიძის სახელობის ქუჩას და საოცარი გრძნობა გვეუფლება - ერისთავის თეატრი ჭეშმარიტად, ლეგენდარული არტისტების თანავარსკვლავედია.
ნათელი მის ხსოვნას.
ერისთავის თეატრის მუზეუმი.
